Es Znacht für ei Einzigi

Die glychi Prozedur wie au Johr

Fröläin Sophie: Gueten Obe, James.

James: Dir gseht hüt aber sehr guet us, Fröläin Sophie.

Fröläin Sophie: Ähä, i füehle mi ou sehr vüu besser. Merci, James.

James: Guet, guet …

Fröläin Sophie: Auso, ig, i mues säge, es gseht aus sehr nätt us.

James: Merci vüu mou, Fröläin Sophie, merci.

Fröläin Sophie: Sy au zäme do?

James: So isch es, jawoll, jo … Au zäme sy do für öiche Geburtstag, Fröläin Sophie.

Fröläin Sophie: Sy aui föif Plätz ddeckt?

James: Aus isch ddeckt, wie gäng.

Fröläin Sophie: Sir Toby?

James: Sir Toby, jo. Är hocket das Johr dohie, Fröläin Sophie.

Fröläin Sophie: Admirau vo Schneider?

James: Der Admirau vo Schneider hocket dohie, Fröläin Sophie.

Fröläin Sophie: Der Herr Pommeroy?

James: Der Herr Pommeroy han i hie näben öich häre gsetzt.

Fröläin Sophie: Und mi sehr lieb Fründ, der Herr Winterbottom?

James: Rächts vo öich, eso wie ders heit gwünscht gha, Fröläin Sophie.

Fröläin Sophie: Merci, James. De chöiter jetzd Suppen usegä.

James: D Suppe, jawoll, Fröläin Sophie. Merci. Au zäme warten uf nech. E chly Mulligatawny-Suppe, Fröläin Sophie …

Fröläin Sophie: Mulligatawny-Suppe hani bsun­gers gärn, James.

James: Jo, i weiss.

Fröläin Sophie: I gloube, mir näh jetz e Sherry zur Suppe.

James: Sherry zur Suppe, jo … Ou, wemer scho drann sy, die glychi Prozedur wie letschts Johr, Fröläin Sophie?

Fröläin Sophie: Die glychi Prozedur wie au Johr, James.

James: Die glychi Prozedur wie au Johr, James …

Fröläin Sophie: Isch das e trochne Sherry, James?

James: Jo, das isch ganz e trochne Sherry, Fröläin Sophie. Sehr troche. Hüt am Morge früsch usem Chäuer ghout, Fröläin Sophie.

Fröläin Sophie: Sir Toby!

James: Sehr zum Wouh, Fröläin Sophie!

Fröläin Sophie: Admirau vo Schneider!

James: Uf öiches… Mues is das Johr säge, Fröläin Sophie?

Fröläin Sophie: Nume mir zlieb, James.

James: Numen öich zlieb. Sehr gärn, jo, jo… Skoll!

Fröläin Sophie: Herr Pommeroy!

James: Es guets Nöis, Sophie!

Fröläin Sophie: Und mi lieb Herr Winterbottom!

James: Tjo, do wäremer auso wider, mini auti Liebi…

Fröläin Sophie: Dir chöit jetz der Fisch serviere.

James: Der Fisch. Sehr gärn, Fröläin Sophie. Hei­ter d Suppe gärn gha?

Fröläin Sophie: Delikat, James.

James: Merci, Fröläin Sophie. Das freut mi, das der se gärn heit gha. – E chly Nordsee-Schellfisch, Fröläin Sophie?

Fröläin Sophie: I gloube, mir näh chly Wysse zum Fisch.

James: Wysse zum Fisch. Die glychi Prozedur wie letschts Johr, Fröläin Sophie?

Fröläin Sophie: Die glychi Prozedur wie au Johr, James!